பரிசு பெட்டகம் சின்னத்தை வாக்காளர்களிடம் கொண்டு சென்று வெற்றி பெறுவோம்: தங்க தமிழ்ச்செல்வன்

மார்ச் 29, 2019 06:49

ஆண்டிப்பட்டி: டி.டி.வி. தினகரனின் அம்மா மக்கள் முன்னேற்ற கழகத்துக்கு குக்கர் சின்னம் ஒதுக்க தேர்தல் ஆணையம் மறுத்து விட்டது. அதற்கு பின்னர் பொதுவான சின்னம் தேர்வு செய்து கொள்ளலாம் என உத்தரவிட்டுள்ளது. அதன்படி டி.டி.வி. தினகரன் அணிக்கு பரிசு பெட்டகம் சின்னம் இன்று ஒதுக்கப்பட்டுள்ளது. 

இது குறித்து தேனி பாராளுமன்ற தொகுதி அ.ம.மு.க. வேட்பாளர் தங்க தமிழ்ச்செல்வனிடம் டெலிபோனில் தொடர்பு கொண்டு கேட்டபோது, அவர் கூறியதாவது:- 

எங்களிடம்தான் பூத் கமிட்டி உள்பட அனைத்து வேலைகளுக்கும் நிர்வாகிகள் உள்ளனர். அடிமட்ட தொண்டனும் அ.ம.மு.க.விடம் உள்ளனர். எனவே எங்களுக்கு வெற்றி வாய்ப்பு பிரகாசமாக உள்ளது. சின்னம் ஒரு பெரிதல்ல. ஆனாலும் இரட்டை இலை சின்னத்தை கைப்பற்றியே தீருவோம். 

தற்போது பரிசு பெட்டகம் சின்னம் ஒதுக்கியது மகிழ்ச்சியளிக்கிறது. இதனை அனைத்து வாக்காளர்களிடமும் கொண்டு சென்று வெற்றி பெறுவோம். எங்களுக்குதான் மக்கள் செல்வாக்கு உள்ளது என அவர் கூறினார்.