ஜிம்பாப்வேக்கு எதிரான 2வது டெஸ்டில் பாகிஸ்தான் வெற்றி: 2-0 என தொடரை கைப்பற்றியது

மே 11, 2021 06:40

ஹராரே: பாகிஸ்தான், ஜிம்பாப்வே அணிகளுக்கு இடையிலான இரண்டாவது டெஸ்ட் போட்டி ஹராரேயில் நடைபெற்றது. டாஸ் வென்ற பாகிஸ்தான் அணி முதலில் பேட்டிங்கை தேர்வு செய்தது. முதல் இன்னிங்சில் பாகிஸ்தான் அணி 147.1 ஓவரில் 8 விக்கெட் இழப்புக்கு 510 ரன்கள் எடுத்து டிக்ளேர் செய்தது. அபித் அலி 215 ரன்களுடன் ஆட்டமிழக்காமல் இருந்தார். அசார் அலி 126 ரன்னிலும், நவ்மன் அலி 97 ரன்னிலும் ஆட்டமிழந்தனர்.

ஜிம்பாப்வே சார்பில் முசாராபனி 3 விக்கெட்டும், சிசோரா 2 விக்கெட்டும் வீழ்த்தினர். இதையடுத்து, முதல் இன்னிங்சை ஆடிய ஜிம்பாப்வே அணி 60.4 ஓவர்களில் 132 ரன்களுக்கு ஆல் அவுட்டாகி பாலோ-ஆன் ஆனது. அந்த அணியில் சகாப்வா அதிகபட்சமாக 33 ரன்கள் எடுத்தார். பாகிஸ்தான் சார்பில் ஹசன் அலி 5 விக்கெட்டும், சஜித் கான் 2 விக்கெட்டும் வீழ்த்தினர்.

தொடர்ந்து, ஜிம்பாப்வே இரண்டாவது இன்னிங்சை ஆடியது. சகாப்வா பொறுப்புடன் ஆடி அரை சதமடித்து 80 ரன்னில் அவுட்டானார். பிரெண்டண் டெய்லர் 49 ரன்னில் ஆட்டமிழந்தார். மூன்றாம் நாள் முடிவில் ஜிம்பாப்வே அணி 63 ஓவர்கள் முடிவில் 9 விக்கெட்டுகளை இழந்து 220 ரன்கள் எடுத்துள்ளது. லூக் ஜாங்வே 30 ரன்னுடன் களத்தில் உள்ளார்.

இந்நிலையில், நான்காவது நாள் ஆட்டமின்று நடைபெற்றது. ஜாங்வே 37 ரன் எடுத்து ஆட்டமிழந்தார். முசாராபனி 4 ரன்கள் எடுத்து ஆட்டமிழக்காமல் உள்ளார்.
இறுதியில், ஜிம்பாப்வே அணி 68 ஓவர்களில் 231 ரன்னுக்கு ஆல் அவுட்டானது.  இதனால், பாகிஸ்தான் ஒரு இன்னிங்ஸ் மற்றும் 147 ரன்கள் வித்தியாசத்தில் வெற்றி பெற்றது. மேலும், டெஸ்ட் தொடரை 2-0 என்ற கணக்கில் கைப்பற்றியது.

பாகிஸ்தான் சார்பில் நவ்மன் அலி 5 விக்கெட்டும், ஷஹீன் அப்ரிதி 5 விக்கெட்டும் வீழ்த்தினர். ஆட்டநாயகன் விருது அபித் அலிக்கும், தொடர் நாயகன் விருது ஹசன் அலிக்கும் வழங்கப்பட்டது.